Ўзбекистон Humans раҳбари Владимир Добрынин ва “Ўзметкомбинат” собиқ раҳбарини халқаро қидирувга берди
Humans алоқа ва финтех компанияси раҳбари Владимир Добрынин ҳамда “Ўзметкомбинат” собиқ раҳбари Дилшод Ахмедов Interpol орқали халқаро қидирувга берилди. Добринин жиноий даромадларни легаллаштириш ва ноқонуний ўйинларни ташкил этишда, Ахмедов эса ўзлаштириш ва растарата йўли билан талон-торож қилишда айбланмоқда.
Ўзбекистон Humans алоқа ва финтех компанияси раҳбари Владимир Добрынин ҳамда “Ўзметкомбинат” собиқ раҳбари Дилшод Ахмедовни халқаро қидирувга берди. Бу ҳақда Interpol’нинг расмий сайтида маълум қилинди.
Маълумотларга кўра, Владимир Добрынин Жиноят кодексининг 243-моддаси (жиноий фаолиятдан олинган даромадларни легаллаштириш) ҳамда 278-моддаси (қимор ва таваккалчиликка асосланган бошқа ўйинларни ташкил этиш ва ўтказиш) билан айбланмоқда.
Дилшод Ахмедовга эса Жиноят кодексининг 167-моддаси 3-қисми — ўзлаштириш ёки растрата йўли билан талон-торож қилиш айби қўйилган.
Дилшод Ахмедов “Ўзметкомбинат” раҳбари лавозимида 2024 йил октабрдан 2025 йил августигача фаолият юритган. Ушбу лавозимга тайинланишидан аввал у Инвестициялар, саноат ва савдо вазири ўринбосари, шунингдек корхона бошқаруви раисининг биринчи ўринбосари сифатида ишлаган.
