Ўзбекистон февраль ойида жаҳондаги иккинчи энг йирик олтин харидори бўлди

Дунё марказий банклари 2026 йил февраль ойида 19 тонна олтин харид қилди. Бу ҳақда World Gold Council ҳисоботида келтириб ўтилган. Ўзбекистон эса бу жараёнда етакчи харидорлардан бири бўлди.

Мазкур кўрсаткич ўтган йилнинг шу давридаги 26 тонналик харидга нисбатан бироз паст. Йил бошидан буён икки ой ичида марказий банклар жами 25 тонна олтин сотиб олди. Бу эса ўтган йилнинг шу давридаги 50 тонна кўрсаткичидан анча паст суръатни кўрсатади.

Февраль ойидаги харидларнинг асосий қисмини Полша миллий банки амалга оширди. Банк бир ойда 20 тонна олтин сотиб олди. Натижада мамлакатнинг олтин захиралари 570 тоннага етди ва жами захираларнинг 31 фоизини ташкил этди. Банк олтин захираларини 700 тоннага етказиш мақсад қилган.

Ўзбекистон эса мазкур ойда дунё миқёсида иккинчи энг йирик олтин харидори бўлди. Марказий банк февраль ойида 8 тонна олтин харид қилиб, ўз захираларини 407 тоннага етказди. Бу мамлакатнинг жами захираларининг 88 фоизини ташкил этади. Йил бошидан буён Ўзбекистон жами 16 тонна олтин сотиб олган.

Малайзия Negera банки ҳам февраль ойида олтин харидини давом эттириб, 2 тонна қўшимча сотиб олди. Йил бошидан буён банкнинг соф харидлари 5 тоннани ташкил этади.

Чехия Миллий банки ҳам олтин захираларини изчил ошириб бормоқда — ҳозирда банкнинг олтин захиралари 75 тоннага, яъни жами захираларнинг 7 фоизига етган.

Худди шундай ҳолат Хитой Халқ банкида ҳам кузатилмоқда. Банк кетма-кет 16 ой давомида олтин сотиб олиб, захираларини 2 308 тоннага ёки жами захираларнинг 10 фоизига етказди.

Февраль ойида айрим давлатларда олтин захиралари камайди. Энг катта пасайиш Туркия (8 тонна) ва Россия (6 тонна) ҳиссасига тўғри келди. Туркия ҳолатида камайиш марказий банк захираларидан кўра, ғазначилик балансидаги олтин ҳажмининг қисқариши билан боғлиқ бўлиши мумкин.