Ўзбекистон банклари 2025 йилда қанча соф фойда олди?
2025 йилда Ўзбекистон банк тизими рекорд даражада — жами 15,5 трлн сўм соф фойда олди. Энг юқори молиявий натижалар Ўзмиллийбанк, SQB ва Капиталбанк ҳиссасига тўғри келди. Шу билан бирга, 2024 йилда катта зарар кўрган МК Банк, БРБ ва Ипотекабанк 2025 йилда фойдага қайтган бўлса, TBC Bank соф фойдаси сезиларли пасайиб, деярли нолга тушди.
2025 йилда Ўзбекистон банк тизими жами 15 трлн 502 млрд сўм соф фойда қайд этди.
Бу кўрсаткич 2024 йилга нисбатан икки баробардан, аниқроғи 122,5 фоизга юқори ҳисобланади. Маълумот учун, 2024 йилда банклар жами 6,96 трлн сўм соф фойда олган эди. Банклар кесимидаги соф фойда ҳақида Bankers.uz оператив маълумотларга таяниб хабар берди.
2025 йилда ҳам энг юқори соф фойда Ўзмиллийбанк ҳиссасига тўғри келди — банк йилни 1,92 трлн сўм соф фойда билан якунлади. Бу 2024 йилга нисбатан 196,8 млрд сўмга кўп. Кейинги ўринларда SQB (1,88 трлн сўм) ва Капиталбанк (1,79 трлн сўм) жойлашди. Шунингдек, Hamkorbank ва Orient Finans Bank ҳам 1 трлн сўмдан ортиқ соф фойда кўрсатди.
Давлат банклари
| Банк номи | 2025 йил якуни | Ўзгариш |
| NBU | 1 919,0 | +196,8 |
| SQB | 1 880,1 | +576,9 |
| Xalq Banki | 702,5 | +434,0 |
| Biznesni Rivojlantirish Banki | 503,0 | +2 734,1 |
| Asakabank | 254,2 | +212,6 |
| Aloqabank | 251,5 | +61,5 |
| MKBANK | 160,8 | +1 864,6 |
| Agrobank | 97,7 | +28,6 |
| Turonbank | 24,9 | +1,8 |
Давлат банклари 2025 йил якунида жами 5 трлн 793,7 млрд сўм соф фойда олди. Муҳим жиҳати шундаки, йилни бирорта ҳам давлат банки зарар билан якунламади. 2024 йилда катта зарар кўрган Микрокредитбанк (−1,7 трлн сўм) ва Бизнесни ривожлантириш банки (−2,2 трлн сўм) 2025 йилда мос равишда 160,8 млрд сўм ва 503,0 млрд сўм соф фойда қайд этди.
Давлат банклари орасида Ўзмиллийбанк ва SQB етакчиликни сақлаб қолди. Халқ банки, Бизнесни ривожлантириш банки ва Асакабанкда ҳам сезиларли ўсиш қайд этилди.
Хусусий ва хорижий капитал иштирокидаги банклар
2025 йилда соф фойда бўйича ТОП–10 банкнинг еттитаси давлат улушига эга бўлмаган банклар бўлди. Ушбу банклар йил давомида жами 9,7 трлн сўм соф фойда олди. Давлат улуши бўлмаган банклар орасида Капиталбанк етакчи бўлиб қолди. Ундан кейинги ўринларни Hamkorbank (1,71 трлн сўм) ва Orient Finans Bank (1,04 трлн сўм) эгаллади.
| Банк номи | 2025 йил якуни | Ўзгариш |
| Kapitalbank | 1 788,3 | +632,4 |
| Hamkorbank | 1 705,0 | +278,4 |
| OFB | 1 044,1 | +143,0 |
| Ipak Yo‘li Bank | 929,3 | +18,8 |
| Trastbank | 865,2 | +57,7 |
| KDB Bank Uzbekistan | 691,1 | +164,2 |
| Davrbank | 631,5 | +241,6 |
| Asia Alliance Bank | 505,6 | +105,0 |
| Ipotekabank | 399,9 | +640,1 |
| Anorbank | 302,8 | +112,5 |
| Octobank | 255,9 | +105,3 |
| Universalbank | 240,9 | +84,7 |
| InfinBANK | 112,7 | −129,1 |
Ipak Yuli Bank, Трастбанк ва KDB Bank Uzbekistan ҳам юқори молиявий натижалар қайд этди. 2024 йилда ва 2025 йилнинг биринчи ярмида зарар билан ишлаган Ипотекабанк йил якунига келиб фойдага чиқди ва 399,9 млрд сўм соф фойда билан йилни ёпди.
Шу билан бирга, хусусий банклар орасида ИнфинБАНКда пасайиш кузатилди. Банкнинг соф фойдаси 2024 йилга нисбатан 129,1 млрд сўмга камайиб, 112,7 млрд сўмни ташкил этди.
| Apexbank | 95,6 | +170,6 |
| Uzum Bank | 62,7 | −23,2 |
| Ziraat Bank | 62,2 | −17,2 |
| Tenge Bank | 54,9 | +18,9 |
| Hayot Bank | 41,2 | +63,7 |
| Bank Saderat Tashkent | 25,9 | +0,9 |
| MyBank | 8,9 | +1,9 |
| Openbank | 8,2 | +6,2 |
| AVO Bank | 6,6 | +99,8 |
| Garant Bank | 5,2 | +69,5 |
| Poytaxt Bank | 0,7 | −14,4 |
| TBC Bank | 0,6 | −340,4 |
| Yangi Bank | −136,7 | −104,7 |
2025 йилда фақат икки банк — Пойтахт банк (684 млн сўм) ва TBC Bank (628 млн сўм) йилни 1 млрд сўмдан кам соф фойда билан якунлади. 2024 йилда 341 млрд сўм соф фойда кўрсатган TBC Bank’нинг молиявий натижаси бир йил ичида кескин пасайиб, деярли ноль даражага тушди.
Январь ойида лицензияси чақириб олинган Янги Bank эса 2025 йил якунида 136,7 млрд сўм соф зарар қайд этди.
