Ўзбекистон 2025 йилнинг биринчи чорагида энг кўп олтин сотган давлат бўлди - WGC
Умумий ҳисобда, 2025 йилнинг биринчи чорагида Ўзбекистоннинг олтин захиралари 15 тоннaга камайди.
2025 йилнинг биринчи чорагида глобал олтин бозори марказий банкларнинг фаол харид ва сотувлари билан ажралиб турди. Ушбу давр мобайнида Ўзбекистон Марказий банки энг кўп олтин сотган давлат сифатида қайд этилди.
Январ ойида мамлакат 18 тонна олтин сотиб олиб, энг йирик харидорга айланган бўлса-да, кейинги ойларда захиралар экспорт орқали сезиларли камайди. Жумладан, феврал ойида 12 тонна олтин сотилгани хабар қилинган. Умумий ҳисобда, 2025 йилнинг биринчи чорагида Ўзбекистоннинг олтин захиралари 15 тоннaга камайди.
1 апрель ҳолатига кўра, мамлакат захираларидаги олтин миқдори 11,8 миллион трой унцияни, яъни тахминан 367 тоннани ташкил этмоқда.
Олтин хариди бўйича эса Польша Миллий банки етакчиликни давом эттирди. Шарқий Европада жойлашган ушбу давлат 2024 йилда ҳам энг йирик марказий банк харидори бўлган эди ва 2025 йилнинг дастлабки уч ойида яна 49 тонна олтин қўшиб, умумий етакчилигини сақлаб қолди.
Иккинчи ўринни Хитой Халқ банки эгаллади. Осиё мамлакати 2025 йилнинг биринчи чорагида захирасига яна 13 тонна олтин қўшди. Шу билан Хитойнинг расмий олтин захиралари 2 292 тоннага етди, бу эса мамлакатнинг умумий валюта захираларининг 6,5 фоизини ташкил этади.
Бироқ таҳлилчилар Хитойнинг расмий маълумотларига шубҳа билан қарайди. Таниқли таҳлилчи Ян Ньювенхайснинг тадқиқотларига кўра, Хитой расмий кўрсаткичлардан анча кўп олтинга эга. Унинг таъкидлашича, Пекиндаги яширин захираларда 5 000 тоннaдан ортиқ монетар олтин мавжуд бўлиб, бу расмий эълон қилинган миқдордан икки баробар кўпдир.
Қозоғистон ҳам чорак давомида фаол марказий банклардан бири бўлди. Гарчи февралда 8 тонна олтин сотган бўлса-да, март ойида 11 тонна олтин сотиб олиб, соф харид ҳажмини 6 тоннага етказди. Натижада, мамлакатнинг расмий олтин захиралари 291 тоннани ташкил этди.
Биринчи чорак давомида бошқа қатор давлатлар ҳам олтин харид қилди. Жумладан, Озарбайжоннинг Давлат Нефт Жамғармаси (SOFAZ) 19 тонна, Туркия 4 тонна, Қатар 3 тонна, Миср эса 1 тонна олтин захирасига қўшди. Айни пайтда, Россия 3 тонна, Қирғиз Республикаси эса 2 тонна олтин сотди.
Ушбу маълумотлар Жахон олтин кенгашига(WGC) тақдим этилган расмий ҳисоботларга асосланган. Ҳукуматлар томонидан амалга оширилган олтин харидлари ёки сотувлари бундан ҳам кўпроқ бўлиши мумкин.
