OpenAI ChatGPT орқали юридик ва тиббий маслаҳат беришни тўхтатди
OpenAI 1 ноябрдан бошлаб ChatGPT хизматларида янги фойдаланиш сиёсатини жорий этди. Янги тартибга кўра, фойдаланувчиларга юридик ва тиббий йўналишларда маслаҳат бериш имконияти тўлиқ тўхтатилди. Компания бу қарорни сунъий интеллектдан фойдаланишда хавфсизлик, аниқлик ва профессионал масъулиятни таъминлаш мақсадида қабул қилган.
Сунъий интеллект соҳасида етакчи компания ҳисобланган OpenAI 1 ноябрдан бошлаб ўз хизматларидан фойдаланиш сиёсатини янгилади. Янги қоидаларга мувофиқ, фойдаланувчилар эндиликда ChatGPT орқали юридик ёки тиббий маслаҳат олишлари мумкин эмас.
Компаниянинг расмий баёнотида қайд этилишича, ушбу ўзгариш нотўғри ёки хавфли тавсиялар тарқалишининг олдини олиш мақсадида амалга оширилган. OpenAI таъкидлашича, ChatGPT фақат ўқув ва маълумот бериш мақсадида ишлатилади ҳамда малакали юрист ёки шифокор фикрини алмаштира олмайди.
Шунингдек, янгиланган сиёсатга кўра, фойдаланувчилар ChatGPT’дан олинган маълумотларни ҳуқуқий ёки тиббий қарорлар қабул қилишда асосий манба сифатида ишлатмасликлари керак.
Мазкур ўзгаришлар 1 ноябрдан кучга кирган бўлиб, барча фойдаланувчиларга татбиқ этилади. Шу билан бирга, тест сўровларида дастур аввалгидек хавф ҳақида огоҳлантириб, мутахассис билан маслаҳатлашишни тавсия этишда давом этади.
Янгиланиш, шунингдек, ChatGPT’нинг тиббий тасвирларни таҳлил қилиш имкониятини ҳам чеклайди. Бу эса компаниянинг сунъий интеллект технологияларидан хавфсиз ва масъулиятли фойдаланишни таъминлашга қаратилган сиёсатининг бир қисми ҳисобланади.
