OpenAI ChatGPT-Image 1.5 тасвир генераторини тақдим этди
OpenAI тасвир генерацияси учун мўлжалланган GPT-Image Model 1.5 ни ишга туширди. Янги модель аввалгисига нисбатан тўрт баравар тезроқ ишлайди, кўрсатмаларни аниқроқ бажаради ва кенгайтирилган таҳрирлаш функцияларини таклиф этади.
OpenAI ўзининг энг янги тасвир генерацияси модели — GPT Image Model 1.5’ни расман тақдим этди. Компанияга кўра, ушбу модель аввалги версияларга нисбатан фойдаланувчи кўрсатмаларини анча аниқ бажаради ва янада реал ҳамда батафсил тасвирлар яратиш имконини беради.
GPT-Image Model 1.5 бугундан бошлаб барча ChatGPT фойдаланувчилари учун глобал миқёсда фойдаланишга очилди. Шунингдек, у ишлаб чиқувчилар учун API орқали GPT-Image-1.5 номи билан ҳам тақдим этилган.
Энг муҳим янгиликлардан бири — ChatGPT интерфейсида тасвир яратиш учун махсус ажратилган янги бўлим ишга туширилгани. Ушбу бўлим ён панелда жойлашган бўлиб, унда олдиндан созланган услублар, машҳур дизайнлар ва визуал контентга мослаштирилган муҳит мавжуд. Бу эса оддий чат орқали расм яратишдан тубдан фарқ қилади ва OpenAI’нинг визуал контентга жиддий эътибор қаратаётганини кўрсатади.
OpenAI маълумотларига кўра, GPT-Image Model 1.5 аввалги версияга нисбатан тўрт баравар тезроқ ишлайди, мураккаб ва аниқ кўрсатмаларни янада тўғри талқин қилади ҳамда профессионал даражадаги таҳрирлаш имкониятларини таклиф этади.
Янги модель ёрдамида фойдаланувчилар расмга аниқ объектларни қўшиш ёки олиб ташлаш, алоҳида элементларнинг услубини ўзгартириш, кийим-кечакни виртуал тарзда “кийиб кўриш”, шунингдек тасвир ичидаги деталларни нозик даражада таҳрирлаш имконига эга бўлади. Ушбу функциялар дизайнерлар, контент яратувчилар ва маркетологлар учун айниқса муҳим бўлиб, сунъий интеллект ёрдамида визуал контент яратиш жараёнини янада тез, қулай ва самарали қилади.
Янги модель тақдимоти Disney ва OpenAI ўртасида имзоланган йирик келишувдан атиги бир ҳафта ўтиб эълон қилинди. Ушбу келишувга кўра, Диснейънинг 200 дан ортиқ машҳур қаҳрамонлари келажакда ChatGPT тасвирлари ва Sora AI видеоларига интеграция қилинади.
Ҳозирча GPT-Image Model 1.5 орқали Disney қаҳрамонларини яратиш имкони йўқ — бу функциялар 2026 йил бошида жорий этилиши режалаштирилган. Шунга қарамай, янги модель аллақачон таниқли суперқаҳрамонлар ва машҳур образларга ўхшаш визуал контент яратишни анча осонлаштирмоқда.
