Олтин қуймалари нархи яна рекорд ўрнатди
30 сентябр ҳолатига кўра, олтин қуймасининг бир грамми 1 млн 538 минг сўмни ташкил этди. Жаҳон бозорида ҳам қимматбаҳо металл нархи илк маротаба бир унция учун $3 850 га чиқди.
Ўзбекистонда олтин қуймалари нархи рекорд даражага кўтарилди. 30 сентябр ҳолатига кўра, олтин қуймасининг бир грамми 1 млн 538 минг сўмни ташкил этди. Масалан, 5 граммлик ўлчовли қуйма 7 млн 691 минг сўмдан сотилмоқда.
Олтин қуймаларининг расмий нархлари қуйидагича белгиланди:
- 5 грамм — 7 млн 691 минг сўм
- 10 грамм — 15 млн 383 минг сўм
- 20 грамм — 30 млн 766 минг сўм
- 50 грамм — 76 млн 915 минг сўм
- 100 грамм — 153 млн 830 минг сўм
Ўзбекистонда олтин нархининг ошиши жаҳон бозоридаги ўзгаришлар билан бевосита боғлиқ. 30-сентябр куни халқаро савдоларда олтиннинг бир унцияси $3 872 гача кўтарилиб, тарихий рекордни қайд этди. Хабар тайёрланаётган пайтда эса қимматбаҳо металл $3 835 атрофида савдо қилинмоқда.
Аввалроқ Goldman Sachs банки олтин нархи бўйича янгиланган прогнозини эълон қилганди. Унга кўра, 2026-йил ўрталарига қадар бир унция олтин $4 мингга етиши мумкин. Агар АҚШ Федераль резерв тизимининг мустақиллиги издан чиқса, нарх янада кескин ошиб, $5 минггача етиши эҳтимоли ҳам истисно этилмайди.
