ОКМК ярим йилда $725 млн соф фойда олди
Олмалиқ конь-металлургия комбинати 2026 йилнинг биринчи ярим йиллигида 8,69 трлн сўм соф фойда олди. Бу ўтган йилнинг мос давридаги 4,49 трлн сўмга нисбатан 93,4 фоиз кўп. Фойданинг тез ўсишига тушумнинг 39,8 фоизга кўпайиши ва маҳсулот таннархининг нисбатан секин ошгани асосий таъсир кўрсатган.
Олмалиқ кон-металлургия комбинати 2026 йилнинг биринчи ярим йиллигига оид молиявий ҳисоботини эълон қилди.
Ҳисоботга кўра, компания олти ой давомида 8 трлн 692,3 млрд сўм соф фойда олган. Таққослаш учун, 2025 йилнинг шу даврида бу кўрсаткич 4 трлн 493,5 млрд сўмни ташкил этган эди.
Компаниянинг маҳсулот ва хизматлар сотишдан олган соф тушуми 21,59 трлн сўмдан 30,19 трлн сўмга етган. Шу тариқа, тушум бир йил ичида 8,6 трлн сўм ёки 39,8 фоизга ошган.
Айни пайтда сотилган маҳсулот таннархи нисбатан секинроқ ўсиб, 8,46 трлн сўмдан 9,46 трлн сўмга етган. Натижада ОКМКнинг ялпи фойдаси 57,8 фоизга кўпайиб, 20,73 трлн сўмни ташкил этган.
Тушумнинг таннархга қараганда тезроқ ошиши ялпи фойда маржасини ҳам яхшилаган. Ўтган йилнинг биринчи ярмида ҳар 100 сўмлик тушумнинг 60,8 сўми ялпи фойда сифатида қолган бўлса, жорий йилда бу кўрсаткич 68,7 сўмга етган.
Шу билан бирга, компаниянинг давр харажатлари 3,69 трлн сўмдан 5,02 трлн сўмга ошган. Шунга қарамай, асосий фаолиятдан олинган фойда 63,7 фоизга кўпайиб, 15,83 трлн сўмни ташкил этган.
Молиявий фаолиятдан олинган даромадлар 45,6 фоизга ошиб, 2,5 трлн сўмга етган. Бунинг 2,27 трлн сўми валюта курси фарқидан олинган даромад ҳиссасига тўғри келган.
Айни пайтда молиявий фаолият харажатлари 3,37 трлн сўмдан 3,02 трлн сўмга камайган. Жумладан, валюта курси фарқидан кўрилган зарар 2,82 трлн сўмдан 2,36 трлн сўмга тушган.
Натижада компаниянинг солиқ тўлашдан олдинги фойдаси 90,9 фоизга ошиб, 15,3 трлн сўмга етган. Ҳисобот даври учун 6,61 трлн сўм фойда солиғи ҳисобланган.
Шу тариқа, ОКМКнинг соф фойда маржаси 20,8 фоиздан 28,8 фоизга кўтарилган. Яъни компания ҳар 100 сўмлик тушумдан қарийб 29 сўм соф фойда олган.
Активлар 100 трлн сўмга яқинлашди
2026 йил 1 июль ҳолатига ОКМКнинг жами активлари 99,3 трлн сўмни ташкил этди. Бу йил бошидаги кўрсаткичга нисбатан 12,93 трлн сўм ёки 15 фоизга кўп.
Жорий активлар 26,2 трлн сўмдан 36,81 трлн сўмга ошган. Бунда дебиторлик қарзлари ва қисқа муддатли инвестицияларнинг кўпайиши асосий роль ўйнаган.
Хусусан, дебиторлик қарзлари 13,51 трлн сўмдан 21,26 трлн сўмга етган. Унинг 15,36 трлн сўми муассисларнинг устав капиталига улуш киритиш бўйича қарздорлигига тўғри келади.
ОКМКнинг ўз маблағлари 34,66 трлн сўмдан 43,35 трлн сўмга ошган. Умумий мажбуриятлар эса 51,7 трлн сўмдан 55,95 трлн сўмга кўпайган.
Бироқ узоқ муддатли мажбуриятлар 15 фоизга камайиб, 24,84 трлн сўмга тушган, жорий мажбуриятлар эса 38,5 фоизга ошиб, 31,11 трлн сўмга етган.
