ОКМК соф фойдаси биринчи чоракда 4,72 трлн сўмга етди

Олмалиқ кон-металлургия комбинати 2026 йилнинг биринчи чорагида 4,72 трлн сўм соф фойда кўрди. Бу 2025 йилнинг мос давридаги 1,44 трлн сўмга нисбатан қарийб 3,3 баробарга кўп. Комбинатнинг соф тушуми ҳам сезиларли ошиб, 14,03 трлн сўмни ташкил этди.

Компания даромади бир йил ичида 4,97 трлн сўмга ёки 54,8 фоизга кўпайган. 2025 йилнинг биринчи чорагида ОКМК маҳсулот ва хизматларни сотишдан 9,06 трлн сўм соф тушум олган эди. 2026 йилнинг шу даврида эса бу кўрсаткич 14,03 трлн сўмга етган.

Фойданинг кескин ошишида фақат тушумнинг кўпайиши эмас, балки таннархнинг пасайгани ҳам муҳим роль ўйнаган. Ҳисоботга кўра, сотилган маҳсулот таннархи 4,4 трлн сўмдан 4,21 трлн сўмга камайган. Натижада ялпи фойда 4,66 трлн сўмдан 9,82 трлн сўмга чиқиб, икки баробардан кўпроққа ошган.

Бу компаниянинг рентабеллигида ҳам яққол кўринади. 2025 йил биринчи чорагида ялпи маржа тахминан 51,5 фоиз бўлган бўлса, 2026 йилнинг мос даврида бу кўрсаткич қарийб 70 фоизга етган.

Шу билан бирга, давр харажатлари ҳам ошган. Компаниянинг давр харажатлари 1,54 трлн сўмдан 2,3 трлн сўмга кўтарилган. Бунда асосий улуш бошқа операцион харажатларга тўғри келади — улар 2,13 трлн сўмни ташкил этган.

ОКМКнинг асосий фаолиятдан олган фойдаси 9,11 трлн сўмга етган. Таққослаш учун, ўтган йилнинг мос даврида бу кўрсаткич 3,24 трлн сўм бўлган. 

Компания тўлаши керак бўлган фойда солиғи эса 1 трлн сўмдан 3,75 трлн сўмга ошган.