ОКМК 2025 йилда 11,6 трлн сўм соф фойда олди
ОКМК 2025 йил якунларига кўра 11,6 трлн сўм соф фойда қайд этди. Компания фойдаси бир йил ичида 50,5 фоизга ошган бўлса, IV чоракдаги ўсиш 111 фоизни ташкил этди.
“Олмалиқ кон-металлургия комбинати” АЖ (ОКМК) 2025 йил якунларига кўра 11,6 трлн сўм соф фойда қайд этди. Бу ҳақда KAP DEPO инвестиция компанияси маълумот берди.
Қайд этилишича, мазкур кўрсаткич 2024 йилнинг мос даврига нисбатан 50,5 фоизга юқори. Фақатгина IV чорак якунлари бўйича корхонанинг соф фойдаси 3,3 трлн сўмни ташкил этиб, йиллик ҳисобда 111,1 фоизга ошган.
2025 йил ҳолатига кўра, компаниянинг тақсимланмаган соф фойдаси 15,9 трлн сўмга етган. Шу билан бирга, корхонанинг жами активлари 86,4 трлн сўмни ташкил этмоқда.
Ҳисобот даврида экспорт тушуми 510,4 млн долларни ташкил этиб, бу умумий тушумнинг 12,1 фоизига тенг бўлган. Таққослаш учун, 2024 йилнинг шу даврида экспорт ҳажми 610,9 млн долларни (19,5 фоиз) ташкил этган.
Бундан ташқари, компаниянинг узоқ муддатли кредит ва қарзлари 1,6 трлн сўмга ошиб, 28,5 трлн сўмга етган. Қисқа муддатли мажбуриятлар эса аксинча 1,1 трлн сўмга камайиб, 2,5 трлн сўмни ташкил қилган.
