Низомий университетининг Тошкентдаги тўртта объекти 1 трлн сўмга сотувга қўйилди
Савдога университетнинг 6,29 гектар ердаги ётоқхоналари ва учта факультет биноси чиқарилган.
Тўртта лотнинг жами бошланғич нархи 1,008 трлн сўмни ташкил этади.
Университет эса босқичма-босқич Янги Тошкентдаги кампусга кўчирилмоқда.
Низомий номидаги Ўзбекистон Миллий педагогика университетининг Тошкент шаҳридаги тўртта кўчмас мулк объекти “E-auksion” орқали сотувга қўйилди.
Энг қиммат лот — Чилонзор-19 мавзесидаги Табиий фанлар факультети биноси. 2,25 гектарлик объект 325,9 млрд сўмдан савдога чиқарилган.
Муқимий кўчасида университет ётоқхоналари жойлашган 1 гектарлик мажмуа учун 272,3 млрд сўм бошланғич нарх белгиланган.
Яшнобод тумани, Фарғона йўли кўчасидаги Ҳарбий таълим факультети биноси 268,7 млрд сўмдан сотувга чиқарилди. Объектнинг ер майдони 2,52 гектарни ташкил этади.
Яккасарой тумани, Шота Руставели кўчасидаги Филология факультети биноси эса 141,1 млрд сўмга баҳоланган. Ушбу лот 52 сотих ер майдонини эгаллаган.
Барча объектлар учун бир хил асосий шарт белгиланган. Харидор улар негизида шаҳарсозлик талабларига мувофиқ нодавлат таълим муассасасини ташкил қилиши ва таълим фаолияти йўналишини сақлаб қолиши керак.
Бу университетнинг Тошкентда савдога чиқарилган биринчи мулклари эмас. Аввалроқ Чилонзор туманидаги 5,64 гектарлик асосий кампус ҳам 886,6 млрд сўм бошланғич нархда аукционга қўйилганди. Бироқ ушбу лот бўйича аукцион натижасида кампус сотилмаган.
Университет мулкларини хусусийлаштириш Янги Тошкентдаги янги кампус қурилиши билан боғлиқ. 23 август куни 40 гектар майдонда барпо этилаётган мажмуанинг биринчи босқичи очилди.
Янги кампусда жами 20 минг талабага мўлжалланган ўқув бинолари ва 5 минг ўринли талабалар турар жойлари бўлиши режалаштирилган. Ҳозиргача 12 минг талабага мўлжалланган беш қаватли ўқув биноси ва замонавий лаборатория мажмуаси қуриб битказилган.
