Низомий университетининг асосий биноси 269 млрд сўмга қайта сотувга қўйилди
Тошкент шаҳридаги Низомий номидаги Ўзбекистон миллий педагогика университетининг асосий ўқув биноси аукционга чиқарилди. Обектнинг бошланғич нархи 269,2 млрд сўм этиб белгиланган. Харидор бинони 2029 йил охиригача кутишига тўғри келиши мумкин.
Давлат активларини бошқариш агентлиги Низомий номидаги Ўзбекистон миллий педагогика университетининг Тошкент шаҳри Чилонзор туманидаги асосий ўқув биносини аукционга чиқарди.
“Чилонзор” метро бекати яқинида жойлашган тўрт қаватли бинонинг умумий майдони 9 107 квадрат метрни ташкил этади. Объектга 1,675 гектар ер участкаси бириктирилган бўлиб, унинг бошланғич нархи 269,2 млрд сўм этиб белгиланган.
Аукцион 26 октябрь куни соат 10:00 да ўтказилиши режалаштирилган.
Университетнинг эски кампусидаги ёрдамчи иншоотлар ҳам алоҳида лот сифатида сотувга қўйилган. Улар орасида уч қаватли ошхона, икки қаватли кутубхона ва спорт майдончаси мавжуд.
Мазкур объектларнинг умумий бино майдони 1 818 квадрат метрни, ер участкаси эса 1,43 гектарни ташкил этади. Лотнинг бошланғич нархи 207,24 млрд сўм этиб белгиланган.
Шу тариқа, эски кампус ҳудудидаги жами 3,1 гектар ерга эга ушбу икки лотнинг бошланғич қиймати 476,4 млрд сўмни ташкил этмоқда.
Савдо шартларига кўра, харидорлар объектлар негизида нодавлат таълим муассасасини ташкил этиши керак. Университетнинг Янги Тошкентга кўчирилиши муносабати билан бинолар харидорларга 2029 йил охиридан кечиктирмай топширилиши назарда тутилган.
Таққослаш учун, Pinkod 22 июнь куни хабар берганидек, университетнинг Бунёдкор шоҳкўчаси, 27-уйда жойлашган 5,64 гектарлик асосий кампуси дастлаб яхлит лот сифатида 886,6 млрд сўмга савдога чиқарилган эди. Бироқ аукцион якунида объект сотилмаган.
Ҳозирги савдоларда кампуснинг айрим қисмлари алоҳида лотларга ажратилган.
Бундан ташқари, август ойида университетнинг Тошкентдаги яна тўртта объекти жами 1,008 трлн сўм бошланғич нархда сотувга қўйилганди. Улар орасида Табиий фанлар, Ҳарбий таълим ва Филология факультетлари бинолари, шунингдек, университет ётоқхоналари мавжуд.
Университетнинг мавжуд объектларини хусусийлаштириш унинг Янги Тошкентдаги кампусга босқичма-босқич кўчирилиши билан боғлиқ.
Жорий йилнинг 23 август куни янги кампуснинг биринчи босқичи фойдаланишга топширилган. Умумий майдони 40 гектар бўлган мажмуада 20 минг талабага мўлжалланган ўқув бинолари ва 5 минг ўринли талабалар турар жойларини ташкил этиш режалаштирилган.
