Мурожаатлар бўйича энг салбий кўрсаткич қайд этилган 10 та банк очиқланди
2026 йилнинг учинчи чорагида Марказий банкка банклар фаолияти юзасидан 12,3 мингдан ортиқ мурожаат келиб тушган. Мижозлар сонига нисбатан ҳисобланган мурожаатлар индексида энг юқори кўрсаткич Ҳаёт Банк, Бизнесни ривожлантириш банки ва Микрокредитбанкда қайд этилган.
Марказий банк июль–сентябрь ойларида тижорат банклари фаолияти юзасидан келиб тушган мурожаатларни таҳлил қилди. Регуляторнинг хабар беришича, ушбу даврда бевосита ва бошқа давлат органлари орқали жами 12 307 та мурожаат қабул қилинган.
Мурожаатлар индексида Ҳаёт Банк 5,71 кўрсаткич билан биринчи ўринни эгаллаган. Бизнесни ривожлантириш банкида индекс 3,17 ни, Микрокредитбанкда эса 2,53 ни ташкил этган.
Кейинги ўринларда ТБС Банк — 1,96, АНОРБАНК — 1,86 ва Туронбанк — 1,62 кўрсаткич билан жойлашган. Шунингдек, ўнталикка Асакабанк — 1,27, Инфинбанк ва АВО банк — 1,25 дан ҳамда Капиталбанк — 1,24 индекс билан кирган.
Марказий банкка кўра, мижозлар сонига нисбатан мурожаатлар улушининг юқорилиги банкларда хизмат сифатига кўпроқ эътибор қаратиш зарурлигини кўрсатади. Хусусан, мижозларга маҳсулот ва хизматлар шартларини етарлича тушунтириш, мурожаатларга ўз вақтида ва мазмунли жавоб бериш муҳим.
Бундан ташқари, банкларга такрорий мурожаатларга сабаб бўлаётган тизимли камчиликларни бартараф этиш, хизмат кўрсатиш сифати ва ички назоратни кучайтириш тавсия қилинган. Регулятор мурожаатлар сабабларини чуқур ўрганиш ҳамда уларни кўриб чиқиш тартибини такомиллаштириш зарурлигини билдирган.
Мазкур индекс банкнинг молиявий барқарорлиги ёки ишончлилигига баҳо бермайди. У мижозлар сонига нисбатан келиб тушган мурожаатлар улушини акс эттиради. Чорак давомида 100 тадан кам мурожаат келиб тушган банклар бўйича индекс ҳисобланмайди.
