Mobiuz алоқа оператори $351 млнга АҚШлик инвесторлар консорсиумига сотилди
Савдо жараёни якунларига кўра, АҚШнинг McKim and Company компанияси бошчилигидаги консорциум оператор учун $351 млн таклиф билан ғолиб деб топилди. Харидор, шунингдек, компаниянинг телекоммуникация инфратузилмасини ривожлантириш учун $500 млнгача инвестиция киритишни режалаштирмоқда.
“Universal Mobile Systems” МЧЖ (MobiUz) устав капиталидаги 100 фоиз давлат улушини сотиш бўйича халқаро очиқ савдо жараёни якунланди. Бу ҳақда Давлат активларини бошқариш агентлиги хабар берди.
Хусусийлаштириш якунларига кўра, АҚШнинг McKim and Company компанияси бошчилигидаги молиявий инвесторлар ҳамда соҳавий технологик ҳамкор JVR Enterprises LLC иштирокидаги консорциум таклифи ғолиб деб топилган.
Ғолиб таклифга кўра, MobiUz қиймати $351 млн даражасида баҳоланган. Бундан ташқари, консорциум телекоммуникация инфратузилмасини ривожлантириш учун $500 млнгача инвестиция киритишни режалаштирмоқда.
Шу билан бирга, битим ҳали тўлиқ ёпилган деб ҳисобланмайди. Уни якунлаш учун тегишли тартибга солувчи органлардан рухсатномалар олиш ҳамда белгиланган корпоратив ва ҳуқуқий тартиб-таомилларни бажариш талаб этилади.
Алоқа операторини хусусийлаштириш жараёнига Rothschild & Co стратегик консультант, KPMG молиявий консультант, Deloitte эса мустақил баҳоловчи сифатида жалб қилинган.
Агентлик маълумотларига кўра, жараёнда АҚШ, Япония, Форс кўрфази мамлакатлари, Европа ва Кавказорти минтақаларидан 15 дан ортиқ инвестор қатнашган. Улардан 10 нафари дастлабки нарх таклифларини тақдим этган, кейинги босқичда эса 6 та иштирокчидан MobiUz’ни сотиб олиш бўйича мажбурий таклифлар қабул қилинган.
Таклифнинг EV/EBITDA мультипликатори 7,4x ни ташкил этган. Агентликка кўра, бу компания қиймати мустақил баҳоловчи аниқлаган қийматдан сезиларли юқори шаклланганини кўрсатади.
