Meta Apple’нинг собиқ муҳандисини ишга олиш учун $200 млн сарфлади

Мета ўзининг “superintelligence” (суперинтеллект) жамоасига кучли мутахассисларни жалб этиш учун рекорд даражадаги маблағлар сарфламоқда. Компания яқинда Apple’даги AI моделлар жамоасини бошқарган муҳандис Руоминг Пангни ишга олди. Bloomberg’га кўра, унга таклиф қилинган компенсация пакети $200 млндан ошади ва бир неча йилга мўлжалланган.

Нашр манбасига кўра, Панғнинг маоши базавий иш ҳақи, йирик кириш бонуси ва Meta акцияларидан иборат. Айнан акциялар пакетининг умумий қиймати энг катта қисмини ташкил этади. Бироқ бу тўловлар дарҳол олинмайди — улар маълум иш фаолияти натижалари ва йиллик ишлаш муддати асосида босқичма-босқич берилади. Яъни, ходим компанияда узоқ қолмаса ёки Meta акциялари ўсмаса, маблағларнинг бир қисми олинмаслиги мумкин.

Meta томонидан ташкил этилган янги сунъий интеллект гуруҳи — “Meta Superintelligence Labs” (MSL) ҳозирда саноатдаги энг йирик маошларни таклиф қилмоқда. Бу гуруҳга ҳозиргача GitHub’нинг собиқ раҳбари Нат Фридман, AI стартап асосчиси Даниел Гросс ва OpenAI, Anthropic, Google каби компаниялардан ўтган бир неча олимлар қўшилди.

Шунингдек, Meta Scale AI асосчиси Александр Вангни бош сунъий интеллект директори сифатида жалб қилган. Бунинг учун компания Wангнинг фирмаси улушининг 49 фоизини $14,3 млрдга сотиб олган.

Бу ёлловлар сунъий интеллект соҳасида кучайиб бораётган истеъдодлар учун курашни яққол намоён қилмоқда. OpenAI раҳбари Сэм Алтман ҳам яқинда Мета рақобатни кескинлаштираётганини тан олди. Унинг айтишича, Meta баъзи ходимларига 100 миллион долларлик кириш бонуслари таклиф қилган, аммо кўпчилик барибир ОпенАИъда қолишга қарор қилган — сабаби компанияда инновацияга бўлган ишонч ва мустаҳкам маданият.

Шунга қарамай, Марк Цукерберг бошчилигидаги Meta сўнгги ойларда 10 дан ортиқ OpenAI ходимларини ишга олишга муваффақ бўлди. Экспертлар фикрича, бу рақобат нафақат технологияларни, балки глобал AI саноатининг келажагини белгилаб беради.