Март ойида йиллик инфляция 10,3 фоизгача тезлашди

Миллий статистика қўмитаси эълон қилган истеъмол нархлари индекси ҳисоботига кўра, 2025 йил март ойида Ўзбекистонда нархлар 0,9 фоизга ошди. 

Бу кўрсаткич 2024 йил март ойидаги 0,67 фоиздан юқорироқ бўлса-да, 2022 йил (1,53 фоиз) ва 2023 йил (1,01 фоиз) март ойларидаги инфлация даражаларидан пастдир. Йиллик инфлация эса 10,3 фоизгача тезлашган.

Март ойида озиқ-овқат инфляцияси бошқа товар ва хизматлар гуруҳларига қараганда юқорироқ бўлди. Озиқ-овқат маҳсулотлари ой давомида ўртача 1,5 фоизга қимматлашди, бу эса ўтган йилнинг шу даврига нисбатан 0,7 фоизга юқори.

Гўшт маҳсулотлари нархи сезиларли даражада ошди — мол гўшти 8,3-8,8 фоиз, қўй гўшти 9,1 фоиз, гўшт қиймаси эса 5,4 фоизга қимматлашди. Товуқ гўшти нархлари 0,1-0,6 фоиз оралиғида ўсди, тирик балиқ эса 1,7 фоизга қимматлашди. 

Шу билан бирга, сариёғ 1,1 фоиз, сут 0,9 фоиз, спиртсиз ичимликлар эса 0,5 фоизга ошган. Айни пайтда, гуруч ва буғдой уни нархи мос равишда 2,3 ва 1,4 фоизга пасайди.

Мева ва ёнғоқ нархлари ой давомида деярли ўзгармай, ўртача 0,1 фоизга ошди. Сабзавотлар, илдизмевалилар ва дуккакли маҳсулотлар эса 0,3 фоизга қимматлашди. Айниқса, сабзи 15,7 фоиз, помидор 4,3 фоиз, булғор қалампири 3,8 фоиз, карам ва саримсоқ 2,6 фоиз, пиёз эса 1,9 фоизга ошди. 

Бироқ, бодринг 14,7 фоиз, картошка эса 3,7 фоизга арзонлашди. Тузланган ва маринадланган сабзавотлар ҳамда томат пастаси нархлари 0,1-0,7 фоиз оралиғида пасайди.

Март ойидан бошлаб Сурхондарё вилоятида маиший чиқиндиларни олиб чиқиб кетиш учун тўлов нархи, Тошкент шаҳри ва Сирдарё вилоятида эса кўп қаватли уйларда техник хизмат кўрсатиш тўлови нархи оширилди. Республика бўйича ўртача ҳисобда ушбу хизматлар учун тарифларнинг ошиши 4 фоизни ташкил этди. Турар жой биноларини сақлаш ва таъмирлаш учун материаллар нархи эса ўртача 0,2 фоизга пасайди.

Транспорт хизматлари бўйича авиачипта нархлари 4,4 фоизга (ички йўналишлар-3,9 фоиз, халқаро йўналишлар-4,8 фоиз) ошди. Такси нархи 0,5 фоизга қимматлаган бўлса, темир йўл чипталари 0,4 фоизга кўтарилди.

Бундан ташқари, ҳуқуқий хизматлар учун тўлов 6,5 фоизга ошди. Заргарлик буюмлари, қўл ва шунга ўхшаш соатлар нархи 2,3 фоизга, сартарошхона хизматлари эса 0,6 фоизга қимматлашди.