Марказий банк январь ойида 7 та банк ва 1 та микромолия ташкилотини жаримага тортди

Марказий банкнинг Bank назорати қўмитаси 2026 йил январь ойидаги йиғилишларида жами 27 та масалани кўриб чиқди. Бу ҳақда регулятор матбуот хизмати маълум қилди.

Рўйхатга олиш ва рухсат бериш йўналишида 17 та масала муҳокама қилинди. Хусусан, 4 та ҳолатда кредит ташкилотлари уставига киритилган ўзгартиришлар рўйхатдан ўтказилди, 2 та масала эса устав фондидаги улушга эгалик қилиш учун рухсат бериш билан боғлиқ бўлди.

Шунингдек, йиғилишларда 3 та тўлов ташкилотига лицензия бериш масаласи кўриб чиқилди. Тижорат банкларининг кузатув кенгаши ва бошқаруви аъзолари, шунингдек, муҳим аҳамиятга эга ходимлар номзодлари бўйича 5 та масала муҳокама қилинди.

Бундан ташқари, Барака Бизнес Ҳамроҳ ҳамда Effective Money микромолия ташкилотлари ўз аризасига асосан микромолия ташкилотлари реестридан чиқарилди. IT Unisoft Group акциядорлик жамиятига берилган тўлов ташкилоти лицензияси ҳам компания аризасига мувофиқ бекор қилинди.

Кредит ташкилотларининг молиявий ҳолатига доир 10 та масала доирасида Марказий банк кўрсатмалари ва пруденсиал меъёрларга риоя этилиши, шунингдек, банклар ва микромолия ташкилотларида ўтказилган инспекция натижалари муҳокама қилинди.

Bank хизматлари истеъмолчилари ҳуқуқларини ҳимоя қилиш ҳамда тўлов ташкилотларининг белгиланган талабларга амал қилиши юзасидан ҳам алоҳида масалалар кўриб чиқилди. Қонунчилик талабларига мувофиқ фаолият юритмаган 4 та тўлов ташкилотига нисбатан қатъий чоралар қўлланиши ҳақида огоҳлантириш берилди.

Шунингдек, корпоратив банк карталарига хизмат кўрсатиш жараёнида қонунчилик талаблари бузилгани ва инспекциялар давомида аниқланган камчиликлар сабабли 7 та банк ҳамда 1 та микромолия ташкилотига нисбатан жарима санкциялари қўлланди.

Бундан ташқари, устав капитали қонунчиликда белгиланган энг кам миқдорга етказилмагани ва банк фаолиятига оид бир қатор талаблар бажарилмагани сабабли “Янги Bank”нинг банк фаолиятини амалга ошириш учун берилган лицензияси бекор қилинди.