Марказий банк валюта курсини ҳисоблаш тартибини ўзгартиради
15 сентябрдан Марказий банк расмий валюта курсини ҳисоблашда фақат валюта биржасидаги эмас, банклараро биржадан ташқари бозорда тузилган битимларни ҳам ҳисобга олади. Натижада расмий курс ички валюта бозоридаги савдоларни кенгроқ қамраб олиб, бозор ҳолатини аниқроқ акс эттириши кутилмоқда.
2026 йил 15 сентябрдан Ўзбекистонда расмий валюта алмашув курсини шакллантириш тартиби ўзгаради. Бу ҳақда Марказий банк маълум қилди.
Ҳозир расмий курс асосан валюта биржасида амалга оширилган битимларга таянган ҳолда шакллантирилади. Янги тартибда эса банкларнинг биржадан ташқари ўзаро валюта операциялари ҳам ҳисоб-китобга қўшилади.
Шу тариқа, расмий курс биржа ва банклараро биржадан ташқари бозорда тузилган битимларнинг ўртача тортилган курси асосида аниқланади. Марказий банкка кўра, бу ёндашув ички валюта бозорида реал амалга оширилаётган битимларнинг каттароқ қисмини қамраб олиш имконини беради.
Ўзгариш расмий курснинг бозор шароитларига сезгирлигини ошириши мумкин. Яъни банклар ўртасида биржадан ташқарида шаклланаётган талаб ва таклиф ҳам эндиликда Марказий банк эълон қиладиган курсга таъсир қилади.
Бундан ташқари, дам олиш кунлари — жумладан, шанба ва якшанба учун алоҳида янги курс шакллантирилмайди. Бу кунларда охирги иш куни учун эълон қилинган расмий курс амал қилади.
Марказий банк бу ўзгаришларни валюта курсини шакллантириш ва эълон қилиш амалиётларини такомиллаштириш ҳамда расмий курсда ички бозор ҳолатини аниқроқ акс эттириш билан изоҳлади.
