Марказий банк 2025 йил учун инфляция прогнозини оширди
Аввалги прогнозга кўра, йиллик инфляция 6-7 фоиз оралиғида шаклланиши керак эди.
Марказий банк йиллик инфляция прогнозини 6-7 фоиздан 8 фоизга кўтарди. Бу ҳақда Марказий банкнинг пул-кредит сиёсатига оид шарҳида келтириб ўтилган.
Инфляцион жараёнларга таъсир қилувчи омиллар, аҳолининг ва тадбиркорларнинг инфляцион кутилмалари ҳамда ташқи иқтисодий муҳитдаги ўзгаришлар прогнозга тузатишлар киритилишига сабаб бўлмоқда.
2025 йил март ойи якунларига кўра, аҳолининг инфляцион кутилмалари ўтган ойга нисбатан 1,1 фоиз бандга камайиб, 14,2 фоизни ташкил этди. Тадбиркорлар орасида эса бу кўрсаткич 0,8 фоиз бандга пасайиб, 13 фоизга тенг бўлди. Ушбу ижобий ўзгаришларда ёқилғи ва энергия таъминотининг яхшиланиши ҳамда миллий валюта курсининг барқарорлиги муҳим роль ўйнади.
Май ойида энергия тарифларининг навбатдаги босқичда эркинлаштирилади. Гарчи тарифлар ўтган йилга нисбатан пастроқ белгиланган бўлса-да, бу чора йиллик инфляция кўрсаткичларини пасайтиришга хизмат қилиши мумкин. Шу билан бирга, энергия нархларининг оширилиши инфляцияга иккиламчи таъсир кўрсатиши эҳтимоли юқори бўлиб қолмоқда. Бундай ҳолатда, таклиф омилларини барқарорлаштириш ва энергия таъминоти узлуксизлигини таъминлаш муҳим аҳамият касб этади.
Халқаро бозорларда кузатилаётган нарх ўзгаришлари, асосий савдо ҳамкор мамлакатлар валюталарининг мустаҳкамланиши ҳамда сўм алмашув курсининг барқарорлашуви фонида яқин ойлар давомида валюта курсидан инфляцияга сезиларли босимлар кутилмаяпти. Шу билан бирга, мамлакат ичида кредитлаш ҳажмининг ошиши ва инвестицион фаолликнинг кучайиши ички талабни қўллаб-қувватламоқда.
Мева-сабзавот маҳсулотларининг ўтган йилги паст база эффекти ҳисобига дефлятсион таъсир қисқариб бориши ва яқин чоракларда бу гуруҳ нархларининг яна ўсиш тенденциясига қайтиши кутилмоқда. Ушбу ўзгаришлар йилнинг учинчи ва тўртинчи чоракларида инфлацияга сезиларли таъсир кўрсатади.
Якунда, Марказий банк томонидан инфляцион прогнознинг 8 фоиз атрофида белгиланиши жорий пул-кредит сиёсатининг қатъийлигини сақлаб қолган ҳолда, йилнинг иккинчи ярмида инфляциянинг пасаювчи тенденциясига ўтишини таъминлаши режалаштирилган.
