KFC, EVOS ва бошқалар: олти ойда қайси умумий овқатланиш корхонаси кўпроқ солиқ тўлади?
2026 йилнинг биринчи ярмида умумий овқатланиш корхоналари 1 трлн сўмдан ортиқ солиқ тўлади. Энг йирик солиқ тўловчилар орасида KFC, EVOS, “Кетринг”, Oqtepa Lavash ва Bellissimo Pizza етакчилик қилмоқда.
2026 йилнинг январь–июнь ойларида умумий овқатланиш фаолияти билан шуғулланувчи 23 148 та юридик шахс томонидан жами 1 трлн 8,9 млрд сўм солиқ тўланган. Бу ҳақда Солиқ қўмитаси маълум қилди.
Таққослаш учун, 2025 йилнинг шу даврида соҳа корхоналари 809,8 млрд сўм солиқ тўлаган эди. Шу тариқа, солиқ тушумлари бир йил ичида 199,1 млрд сўм ёки 24,6 фоизга ошган.
Ҳисобот даврида умумий овқатланиш корхоналарининг товар айланмаси 14,1 трлн сўмни ташкил этди. Уларга қўлланилган солиқ имтиёзлари эса 9,4 фоизга камайиб, 88,7 млрд сўмдан 80,4 млрд сўмга тушган.
Энг кўп солиқ тўлаган компания KFC бренди остида фаолият юритувчи “International FoodChain” бўлди. Корхона олти ойда 52,2 млрд сўм солиқ тўлаган. Бу ўтган йилнинг шу даврига нисбатан 4,8 млрд сўм ёки 10,1 фоиз кўп.
Иккинчи ўринни EVOS тармоғининг оператори “Mak Food Servis” эгаллади. Компаниянинг солиқ тўловлари 31,8 млрд сўмдан 41,4 млрд сўмга етиб, 30,2 фоизга ошган.
KFC ва EVOS ўртасидаги фарқ 10,8 млрд сўмни ташкил этди. Бир йил аввал бу тафовут 15,6 млрд сўмга тенг эди. Шу тариқа, EVOS солиқ тўловлари бўйича KFC билан орадаги фарқни қисқартирган.
Кучли учликни “Uzbekistan Airways” таркибидаги “Кетринг” корхонаси якунлади. Унинг солиқ тўловлари 50,3 фоизга ошиб, 16,5 млрд сўмдан 24,8 млрд сўмга етган.
Oqtepa Lavash оператори “Oqtepa-Food Service” 20 млрд сўм билан тўртинчи ўринни эгаллади. Бир йил аввал компания 18,3 млрд сўм солиқ тўлаган эди.
Энг катта ўсишлардан бири Bellissimo Pizza’да кузатилди. Тармоқ операторининг солиқ тўловлари 1,9 млрд сўмдан 11,7 млрд сўмга етиб, 6 баравардан кўпроққа ошган. Натижада компания рейтингда бешинчи ўринга кўтарилди.
Кейинги ўринларни “Good Food Catering” — 8,1 млрд сўм, “Савдо” — 7,8 млрд сўм, Feed Up — 5,6 млрд сўм, “Alexander Brands” — 5,5 млрд сўм ва “Garden Catering Trade” — 5 млрд сўм билан эгаллади.
Шунингдек, “French Pastry” 4,1 млрд сўм, “Caravan Group Delivery” 4 млрд сўм, “Akfa Food” 3,7 млрд сўм, MaxWay 3,6 млрд сўм, Shashleek 3,3 млрд сўм ва “Vanilla Food” 3,2 млрд сўм солиқ тўлаган.
ТОП-20 корхонанинг жами солиқ тўловлари 215,9 млрд сўмни ташкил этди. Бу бир йил аввалгидан 59,6 млрд сўм ёки 38,1 фоиз кўп. Уларнинг соҳа бўйича жами солиқ тушумларидаги улуши эса 19,3 фоиздан 21,4 фоизга ошган.
