JP Morgan’нинг Россия ва МДҲ бўйича президенти Ян Тавровский Агробанк Кузатув кенгашига мустақил аъзо бўлди
JP Morgan Bank International’нинг Россия ва МДҲ давлатлари бўйича президенти Ян Леонидович Тавровский Агробанк АТБ Кузатув кенгашининг мустақил аъзоси этиб сайланди. У уч йил муддатга Кузатув кенгашининг мустақил аъзоси этиб сайланган. Ян Тавровский 2012 йилдан бери JP Morgan’нинг минтақадаги операцияларига раҳбарлик қилиб келаётган тажрибали инвестиция банкири ҳисобланади.
JP Morgan Bank International’нинг Россия ва МДҲ давлатлари бўйича президенти Ян Леонидович Тавровский Агробанк АТБ Кузатув кенгашининг мустақил аъзоси этиб сайланди. Бу ҳақда банкнинг корпоратив маълумотларидан маълум бўлди.
Маълумотга кўра, жорий йилнинг 15 февраль куни Агробанк акциядорларининг навбатдан ташқари умумий йиғилиши бўлиб ўтган. Унда Ян Леонидович Тавровский номзодини банк Кузатув кенгаши аъзолигига мустақил аъзо сифатида сайлаш масаласи кўриб чиқилиб, акциядорлар томонидан 100 фоиз овоз билан маъқулланган.
Тавровский Ян Леонидович уч йил муддатга Кузатув кенгашининг мустақил аъзоси этиб сайланади. У Марказий банк билан келишувдан сўнг Кузатув кенгаши аъзоси сифатида ўз вазифаларини бажаришга киришади.
Ян Тавровский ўзи ким?
Ян Леонидович Тавровский J.P. Morgan Bank International (Россия)нинг президенти ва бошқарув кенгаши раиси лавозимида фаолият юритаётган таниқли инвестиция банкиридир. У 2012 йилдан буён J.P. Morgan компаниясининг минтақадаги операцияларига раҳбарлик қилиб келмоқда ва Россия молия соҳасидаги энг таъсирли шахслардан бири сифатида кенг эътироф этилган.
Ян Леонидович Тавровский 1970 йил 21 январда туғилган. У 1992 йилда Москва алоқа институтини “Радиоалоқа, радиоэшиттириш ва телевидение” мутахассислиги бўйича тамомлаган. 1994 йилда эса Россия Марказий банки ҳузуридаги Москва банк мактабини “Банкларда бухгалтерия ҳисоби” йўналиши бўйича битирган.
1998 йилда Лондон бизнес мактабида MBA даражасини олган. Шу йилдан бошлаб Лондонда фаолият юритиб, дастлаб Goldman Sachs International’да кредит ва рейтинг бўйича маслаҳат гуруҳида, кейинчалик JP Morgan Securities Ltd’да кредит молиялаштириш гуруҳида ишлаган.
2004 йилда у Россиядаги JPMorgan Bank’нинг корпоратив мижозлар ва капитал бозорлари департаменти раҳбари этиб тайинланган.
2009 йил апрель ойида Morgan Stanley Bank бошқарув раисининг ўринбосари ҳамда Россия ва МДҲ бўйича инвестиция ва банк амалиёти раҳбари лавозимларини эгаллаган.
2010 йил март ойида Ян Тавровский JP Morgan’га Россия ва Украина бўйича инвестиция банки раҳбари ҳамда банкнинг Россия бўлими бош бошқарув директори ўринбосари сифатида қайтган. 2012 йил апрель ойидан эса Россия ва МДҲ давлатлари бўйича JP Morgan президенти лавозимида фаолият юритиб келган.
