Ипотека-банк бошқаруви раисига иккита янги ўринбосар тайинланди
Михаил Данилин ва Мартон Ратки Ипотека-банк OTP Group бошқаруви раисининг янги ўринбосарлари этиб тайинланди. Улар мос равишда ахборот технологиялари ҳамда стратегия ва молия блокларига раҳбарлик қилади. Ҳар икки тайинлов Марказий банк билан келишилгандан сўнг кучга киради.
Ипотека-банк OTP Group бошқаруви таркибида навбатдаги ўзгаришлар амалга оширилди. Бу ҳақда банкнинг корпоратив ахборотида қайд этилган.
Хусусан, Михаил Алексеевич Данилин банк бошқаруви раисининг ўринбосари — ахборот технологиялари блоки раҳбари этиб тайинланди. У банкнинг IT йўналишига масъул бўлади.
Мартон Миклош Ратки (Márton Miklós Rátky) эса бошқарув раисининг ўринбосари — стратегия ва молия блоки раҳбари лавозимини эгаллайди.
Ҳар икки тайинлов Ўзбекистон Марказий банки билан келишилгандан кейин расман кучга кириши белгиланган.
Банк раҳбариятидаги ўзгаришлар
Ипотека-банкда сўнгги ойларда бошқарув таркиби бир неча бор янгиланди.
Жумладан, 2026 йил 27 июлдан Адам Сентпетери банк бошқаруви раиси лавозимига тайинланган эди. У 3 июндан буён ушбу лавозим вазифасини вақтинча бажариб келган. Бунгача Сентпетери банк бошқаруви раисининг ўринбосари сифатида стратегия ва молия блокини бошқарган.
Маълумот учун, Ипотека-банк 2023 йил июнь ойида Венгриянинг OTP Group таркибига кирган. Ўшанда OTP Bank банк акцияларининг 73,71 фоизини сотиб олган.
