Илон Маск руҳий муаммоларни бошдан кечирмоқда

Миллиардер тадбиркор Илон Маскнинг биографи Сет Абрамсон унинг руҳий саломатлиги ва бу масаланинг глобал ҳамда миллий барқарорликка таъсири борасида жиддий хавотирларини билдириб ўтди. 

Абрамсон ўзининг X (аввалги Twitter) платформасидаги постларида Маскнинг стресс, гиёҳванд моддалар истеъмоли ва ноодатий хатти-ҳаракатларини руҳий муаммолар белгилари сифатида кўрсатиб, бу ҳолатлар жиддий муаммоларга олиб келиши мумкин эканлигини таъкидлади.

Абрамсоннинг огоҳлантирувчи даъволари

Сет Абрамсон сўнгги икки йил давомида Маскнинг хатти-ҳаракатларини синчковлик билан кузатиб, тадбиркорнинг руҳий ҳолати жиддий хавотирга сабаб бўлишини айтиб ўтди.

“Мен Илон Маскнинг ростдан ҳам ақлдан озаётганига ишонаман. Мен Маскнинг таржимаи ҳолини ёзадиган биографман ва сўнгги икки йил давомида унинг интернетдаги хулқ-атворини кузатиб келмоқдаман. У руҳий касалликлар, гиёҳванд моддаларни ҳаддан ташқари кўп истеъмол қилиш ва оғир стресс ҳолатларини тан олганини ҳисобга олсак, ҳозир унинг жиддий руҳий носоғлом аҳволда эканлигидан хавотирланишимиз керак”, деб ёзди Абрамсон.

Абрамсон АҚШ маъмуриятидан “Американи Илон Маскдан ҳимоя қилиш” чораларини кўришни сўради.

“Маъмуриятнинг Американи Илон Маскдан ҳимоя қилиш учун шошилинч чоралар кўришга яна 14 кун вақти бор. Бунга у билан тузилган барча АҚШ шартномаларини бекор қилиш, унинг конституцияга зид DOGE ташаббусини тўхтатиш учун суд даъвоси қўзғатиш ва янги федерал ҳамда миллий хавфсизлик текширувларини бошлаш киритиш мумкин", дея қўшимча қилди у.

Маскнинг жамиятга таъсири қандай?

Илон Маскнинг замонавий иқтисодиёт ва инфратузилма ривожланишига таъсири бир неча муҳим соҳаларда ўз аксини топади. SpaceX компанияси орқали у NASA билан ҳамкорлик қилиб, космик тадқиқотлар ва Марсни ўзлаштириш ишларини ривожлантирмоқда, бироқ унинг раҳбарликдаги беқарорлиги ушбу жараёнларга жиддий хавф туғдириши мумкин. 

Tesla орқали эса у иқлим ўзгаришига қарши курашда муҳим роль ўйнаб, электромобиллар ва қайта тикланадиган энергия соҳаларини ривожлантиради, лекин у ерда қабул қилинаётган ноаниқ қарорлар бу йўналишларга тўсиқ бўлиши мумкин.

Neuralink ва Х Ai каби компаниялари орқали Маск сунъий интеллектнинг ривожи ва уни тартибга солиниши жараёнида иштирок этмоқда, лекин унинг раҳбарликдаги хатолари бу соҳанинг глобал миқёсдаги барқарорлигига салбий таъсир қилиши мумкин. Маскнинг қарорлари ва хатти-ҳаракатлари мазкур соҳалар ривожи ва жаҳон миқёсидаги барқарорлик учун муҳим омил бўлиб хизмат қилади.

Энди нима бўлади?

Абрамсоннинг даъволари жамоатчиликда турли фикрларни келтириб чиқарди. Баъзилар унинг гапларига шубҳа билан қараса, бошқалар Маскнинг глобал таъсирини назорат қилишга чақирмоқда. АҚШ ҳукумати ҳали бу масалага расмий жавоб бермади, аммо Маскнинг соҳалардаги таъсирини ҳисобга олсак, унинг шахсий муаммолари жаҳон миқёсидаги катта муаммоларга олиб келиши мумкин. Маскнинг ўзи ҳозирча Абрамсоннинг айбловларига жавоб бермади.

Аввалроқ Илон Маск 2024 йилда ўз бойлигини деярли икки баробарга кўпайтириб олгани хабар қилинганди.