Илон Маск OpenAI ва Сэм Альтманга қарши судда ютқазди
АҚШ федерал суди Илон Маскнинг OpenAI, Сэм Альтман ва Грег Брокманга қарши даъволарини рад этди. Суд хулосасига кўра, Маск ишни белгиланган қонуний муддатдан кеч олиб чиққан, шу сабабли унинг OpenAI’нинг “нотижорат миссиясидан чекингани” ҳақидаги даъволари кўриб чиқилмайди.
АҚШнинг Калифорния штати Окленд шаҳридаги федерал суд Илон Маскнинг OpenAI ва унинг раҳбарларига қарши даъвосини рад этди.
9 кишидан иборат ҳакамлар ҳайъати уч ҳафталик суд жараёнидан сўнг икки соатдан камроқ вақт ичида бир овоздан Маскнинг даъволари қонуний муддат ўтганидан кейин киритилган, деган хулосага келган. Судья Ивонн Гонсалес Рожерс ҳакамлар ҳайъати хулосасини қабул қилиб, ишни ёпган.
Маск OpenAI асосчиларидан бири сифатида компания дастлаб сунъий интеллектни инсоният манфаатига хизмат қилдириш учун нотижорат ташкилот сифатида тузилганини таъкидлаб келади. У Сэм Альтман ва OpenAI президенти Грег Брокманни компанияни асл мақсадидан узоқлаштириб, тижорат моделига ўтказганликда айблаган. Маскнинг даъвосига кўра, OpenAI кейинчалик Microsoft билан яқин ҳамкорлик орқали даромад олишга йўналтирилган тузилмага айланган.
AP маълумотларига кўра, Маск OpenAI’нинг илк йилларида компанияга 38 млн доллар киритган. У бу маблағлар айнан нотижорат лойиҳа учун берилганини айтган. Судда эса OpenAI томони Маск компания тузилмаси ва кейинги йўналишидан йиллар давомида хабардор бўлганини, даъво эса унинг 2023 йилда xAI номли рақобатчи компанияни ишга туширганидан кейинги бизнес рақобати фонида юзага келганини билдирган.
Иш доирасида Маск OpenAI’нинг хайрия йўналишига компенсация тўланишини, шунингдек, Сэм Альтманнинг OpenAI бошқарувидан четлатилишини талаб қилган. Даъво “charitable trust” — яъни хайрия мақсадидаги ишонч мажбуриятини бузиш, асоссиз бойиш ва Microsoft’нинг бу жараёнга кўмаклашгани ҳақидаги бандларни ўз ичига олган. Бироқ ҳакамлар ҳайъати бу талаблар бўйича даъво муддати ўтиб кетганини билдирган.
OpenAI учун бу қарор муҳим ҳуқуқий ғалаба сифатида баҳоланмоқда. Чунки суд жараёни компаниянинг нотижорат миссияси, тижорат модели, Microsoft билан алоқалари ва келажакдаги IPO режаларига таъсир қилиши мумкин эди. Reuters суд қарори OpenAI’нинг оммавий савдога чиқиш йўлидаги йирик ҳуқуқий тўсиқлардан бирини олиб ташлаганини ёзди.
Маск эса қарорга рози эмаслигини билдириб, апелляция беришини айтган. У суд ва ҳакамлар ҳайъати ишнинг мазмунини эмас, фақат “тақвимдаги техник муддат” масаласини кўриб чиққанини даъво қилмоқда. Microsoft эса қарорни олқишлаб, OpenAI билан ҳамкорликни давом эттиришини билдирган.
