Goldman Sachs 2025 йил учун олтин нархи прогнозини $3 700 гача кўтарди
Шунингдек, бошқа бир машҳур банк UBS олтин нархи бир унция учун $3 500 га чиқишини кутмоқда.
Иккала прогнозга ҳам асосий сабаб сифатида Марказий банклар томонидан кучли талаб, глобал савдо можаролари ва рецессия хавфининг ортиб бораётгани кўрсатилмоқда.
Goldman Sachs ва UBS Group 2025 йил учун олтин нархи прогнозларини кўтарди. Бунга асосий сабаб сифатида Марказий банкларнинг олтин харидига бўлган кучли талаби, савдо уруши ва иқтисодий рецессия хавфи кўрсатилмоқда.
Goldman Sachs - $3 700
Goldman Sachs ўз прогнозини жорий йилда учинчи бор янгилади. Эндиликда Wall Street инвестицион банки 2025 йилда олтин нархи $3 700 га етишини кутмоқда. Ташкилотнинг аввалги прогнози $3 300 ни ташкил этган эди.
Банкнинг товарлар бўйича стратегик мутахассиси Лина Томас олтин нархи йил давомида $3 650 дан $3 950 гача бўлган диапазонда савдо қилинишини кутаётганини билдирди.
Таҳлилчиларнинг фикрича, бу ўсишга Марказий банклар томонидан кутилганидан кучлироқ талаб ва рецессия хавфининг ортиши туртки бермоқда. Goldman мутахассислари, облигациялар бозоридаги босимлар "олтиннинг рецессияга қарши хавфсиз восита сифатидаги ноёб позициясига бўлган ишончимизни мустаҳкамлади", дея бу прогнозга изоҳ берган.
Банк иқтисодчиларининг таъкидлашича, яқин 12 ой ичида АҚШда рецессия бўлиш эҳтимоли 45 фоизни ташкил этади. Агар бу сценарий рўй берса, олтин нархи йил охиригача $3 880 га етиши мумкин — баъзи ҳолатларда эса ҳатто $4 500 гача кўтарилиши эҳтимолдан холи эмас.
UBS Group — $3 500
UBS банкининг стратегик таҳлилчиси Жони Тевеснинг жума куни эълон қилинган икки алоҳида ҳисоботига кўра, 2025 йил декабрига келиб олтин нархи бир унция учун $3 500 долларга етиши мумкин.
Банк прогнозига кўра, турли бозор иштирокчилари — жумладан, Марказий банклар, узоқ муддатли активлар бошқарувчилари, макро фондлар, хусусий капитал эгалари ва чакана инвесторлар томонидан олтинга нисбатан кучли талаб бўлиши кутилмоқда.
Глобал савдо ва геосиёсий вазиятдаги беқарорлик хавфсиз активларга, хусусан олтинга бўлган эҳтиёжни орттираётганига эътибор қаратилган. Бироқ Тевеснинг таъкидлашича, бозорда ҳозирча олтинга қизиқиш жуда юқори даражага чиқмаган, бу эса ўсиш учун қўшимча имкониятлар мавжудлигини англатади.
"Бозордаги доимий ноаниқлик инвесторларни портфеллари таркибини диверсификация қилишга ундамоқда, бу эса олтинга бўлган талабни оширади", — дейди у.
Эслатиб ўтамиз, янги прогнозлар олтин нархи ўтган ҳафтада 6,6 фоизга кескин ошиб, душанба куни (14 апрель) бир унция учун $3 245 дан юқори янги рекорд даражага чиққанидан кейин эълон қилинди.
