Франция Apple’ни 150 млн евро жаримага тортди

Франция Рақобат Қўмитаси Apple’га 150 миллион евро (162 миллион доллар) миқдорида жарима солганини эълон қилди. Ушбу қарорга сабаб сифатида Apple’нинг App Tracking Transparency (ATT) функциясини жорий этиш усули бозор рақобатини бузиши кўрсатилди.

Apple 2021-йил iOS 14.5 янгиланиши билан ATT функциясини ишга туширди. Ушбу функция ҳар қандай иловани фойдаланувчини кузатишдан олдин ундан рухсат сўрашга мажбур қилади. Агар фойдаланувчи розилик бермаса, иловалар Identifier for Advertisers (IDFA) маълумотларидан фойдалана олмайди. Бу эса шахсийлаштирилган рекламаларни жойлаштириш имкониятини сезиларли даражада чеклайди.

Франция регулятори ATT тизимининг ўзи ноқонуний эмаслигини тан олса-да, Apple уни рақобатчилар учун мураккаб ва чекловчи тарзда амалга оширганини аниқлади. Apple ўз рекламаларини iOS тизимига бевосита интеграция қилган бўлса, учинчи томон ишлаб чиқувчилар мураккаб рухсат олиш жараёни орқали чекланган. Бу эса кичик наширлар ва реклама платформаларига зарар етказди.

Франция регулятори 2021-йилда Alliance Digitale ва Internet Advertising Syndicate шикоятлари асосида текширув бошлаган эди. Натижада Apple 150 миллион евро жаримага тортилди ва ўз расмий сайтида етти кун давомида ушбу қарорни эълон қилишга мажбур бўлди. Бироқ ҳукумат Apple’дан ATT функциясини ўзгартиришни эмас, балки фақат рақобат қонунчилигига риоя қилишни сўраган.

Франциянинг ушбу қарори Apple’га қарши Европадаги терговлар сонини оширди. Ҳозирда Германия, Италия, Руминия ва Польша ҳукуматлари ATT тизимининг рақобат қоидаларига зид келишини текширишни бошлаган. Бу эса Apple учун Европада янги муаммоларни юзага келтириши мумкин.