Дониёр Абдураҳмонов “Тенге Банк” бошқаруви раиси ўринбосари этиб тайинланди
Дониёр Абдураҳмонов “Тенге Банк” бошқаруви раиси ўринбосари лавозимига тайинланди. У бунга қадар 2020 йил августидан буён банк Кузатув кенгашининг мустақил аъзоси сифатида фаолият юритиб келган.
“Тенге Банк” АТБ Кузатув кенгашининг 2026 йил 28 апрелдаги қарорига мувофиқ, Дониёр Марселович Абдураҳмонов банк бошқаруви раиси ўринбосари лавозимига тайинланди. Мазкур тайинлов Ўзбекистон Республикаси Марказий банки билан белгиланган тартибда келишилган.
Шу муносабат билан Дониёр Абдураҳмоновнинг “Тенге Банк” АТБ Кузатув кенгашининг мустақил аъзоси сифатидаги ваколатлари муддатидан олдин тугатилди. У 2026 йил 8 майдан бошлаб янги лавозимида иш бошлади.
Дониёр Абдураҳмонов 1982 йил 6 июнда туғилган. У Тошкент молия институтини “Молия” йўналиши бўйича тамомлаган. 2013 йилда эса Ўзбекистон Республикаси Банк-молия академияси магистратурасини “Инвестицияларни бошқариш” мутахассислиги бўйича битирган.
Шунингдек, у Швейтсария Миллий банкининг ўқув марказида “Пул-кредит сиёсати, валюта курслари ва капитал ҳаракати” йўналишида таҳсил олган. 2019 йилда Австриядаги Бирлашган Вена институтида “Капитал оқимини бошқариш: макроиқтисодий таҳлил ва сиёсат” ҳамда “Баланс ёндашуви” дастурлари бўйича малака оширган.
Дониёр Абдураҳмонов банк-молия тизимида кўп йиллик тажрибага эга. У меҳнат фаолиятини 2003 йилда Ўзбекистон Республикаси Ташқи иқтисодий фаолият миллий банкида ҳуқуқий маслаҳатчи сифатида бошлаган.
2005–2014 йилларда Марказий банк тизимида турли лавозимларда ишлаган. Жумладан, Валюта айирбошлаш операциялари бош бошқармаси таҳлил бошқармаси раҳбар ўринбосари, Консолидациялашган барқарорлаштириш фонди Ишчи органи раҳбари ўринбосари, Капитал ҳаракати операцияларини мониторинг қилиш бошқармаси раҳбари ҳамда Валютани тартибга солиш ва назорат департаментида бошқарма бошлиғи лавозимларида фаолият юритган.
2014–2016 йилларда “Интермобилгаз” МЧЖда юрист, 2016–2017 йилларда “Равнақбанк” АТБ Валюта операциялари департаменти директори, 2017 йилда эса “Давр банк” АТБ Валюта операциялари бошқармаси бошлиғи сифатида ишлаган.
2017–2020 йилларда у яна Марказий банкда фаолият юритиб, Валютани тартибга солиш ва тўлов баланси департаменти директори лавозимида ишлаган.
Дониёр Абдураҳмонов 2020 йил август ойидан буён “Тенге Банк” АТБ Кузатув кенгашининг мустақил аъзоси сифатида фаолият олиб бораётган эди.
