Доллар расмий курси яна 12 400 сўмдан пастга тушди
4 сентябрь куни амалда бўладиган доллар курси 48 сўм 35 тийинга арзонлаб, 12 374,55 сўмни ташкил қилди. Бу сўнгги икки ҳафта ичида иккинчи маротаба доллар курсининг 12 400 сўмдан пастга тушишидир.
Доллар расмий курси чоршанба куни яна сезиларли даражада пасайди. Бу ҳақда Марказий банк матбуот хизмати маълум қилди.
Кун давомида АҚШ доллари 48 сўм 35 тийинга арзонлаб, 4-сентябрь куни амалда бўладиган курс 12 374,55 сўм этиб белгиланди. Бу сўнгги икки ҳафта ичида иккинчи маротаба доллар курси 12 400 сўмдан пастга тушишидир.
Бошқа асосий валюталар ҳам сўмга нисбатан бироз пасайди. Хусусан, евро 32 сўм 76 тийинга арзонлаб 14 425 сўмни, фунт стерлинг эса 54,89 сўмга тушиб 16 591,8 сўмни ташкил этди.
2025 йил август ойида ўзбек сўми АҚШ долларига нисбатан мустаҳкамланишда давом этди. Миллий валюта бир ой ичида 109,32 сўмга (0,87%) қимматлашиб, 12 482,38 сўмни ташкил этди.
Ойнинг биринчи ярмида курс 12 720–12 500 сўм оралиғида шаклланган бўлса, иккинчи ярмида сўм кескин мустаҳкамланиб, 276 сўмдан кўпроқ ошди ва 2023 йил 7 декабрдан буён энг юқори даражага чиқди. Бироқ охирги кунларда курс яна 176,58 сўмга кўтарилиб, аввалги пасайишни қисман қоплади.
Умуман олганда, дастлабки саккиз ой давомида миллий валюта долларга нисбатан 3,39 фоиз ёки 438 сўмга мустаҳкамланди.
