CLICK 2024 йилда 295 млрд сўм соф фойда кўрди
Бу кўрсаткич мамлакатдаги банкларнинг қарийб 70 фоизи қайд этган соф фойдадан юқоридир.
CLICK тўлов тизими 2024 йил якунлари бўйича молиявий ҳисоботини эълон қилди. Унга кўра, компания ўтган йилни 295,1 миллиард сўмлик соф фойда билан якунлаган. Бу натижа 2023 йилдаги 205,2 миллиард сўмлик фойдага нисбатан 43,8 фоизга кўпдир.
CLICK’нинг йиллик фойдаси мамлакатдаги банкларнинг 69,4 фоизининг (25 та) фойдасидан юқорироқ. 2024 йил давомида банклар қанча соф фойда олгани билан бу ерда танишиш мумкин.
Шунингдек, компаниянинг умумий тушуми ҳам кескин ошган — 2024 йилда кўрсаткич 42,8 фоизга ўсиб, 516,4 миллиард сўмга етган. CLICK’нинг жами капитал ва мажбуриятлари эса 433,5 миллиард сўмни ташкил этиб, бир йил ичида 65,7 фоизга кўпайган.
Ҳисоботда таъкидланишича, компания 2024 йилда 837,1 миллион сўм миқдорида даромад солиғи тўлаган.
Эслатиб ўтамиз, аввалроқ Pinkod UZCARD қарийб 1 триллион сўмлик соф фойда билан йилни якунлагани маълум бўлган эди. Мазкур даврда фақат тўртта банк UZCARD’дан кўпроқ фойда кўрган.
