BlackRock ва Franklin Resources UzNIF акцияларига $300 млн сармоя киритади
Ўзбекистон Миллий инвестиция жамғармаси (UzNIF) Лондон ва Тошкент фонд биржаларида IPO ўтказишни режалаштираётганини тасдиқлади. IPO доирасида маҳаллий акциялар ва халқаро GDR’лар таклиф этилади, якуний нарх эса май ўрталарида эълон қилиниши кутилмоқда. BlackRock ва Franklin Resources каби йирик инвесторлар қарийб 300 млн доллар маблағ киритишга тайёр.
Ўзбекистон Республикаси Миллий инвестиция жамғармаси (UzNIF) 16 апрель куни дастлабки оммавий акциялар таклифи (IPO)ни амалга ошириш режасини тасдиқлади. Жамғарма акцияларини бир вақтнинг ўзида Лондон фонд биржаси ва Тошкент фонд биржасида жойлаштиришни режалаштирмоқда.
IPO доирасида Ўзбекистонда маҳаллий акциялар таклифи ҳамда халқаро миқёсда глобал депозитар тилхатлар (ГДР) чиқарилиши режалаштирилган. Асосий инвесторлар сифатида BlackRock, Franklin Resources ва Redwheel тахминан 300 миллион АҚШ доллари миқдорида маблағ киритишга розилик билдирган.
Режага кўра, акцияларнинг барчаси компаниянинг ягона акциядори ҳисобланган Ўзбекистон Республикаси Иқтисодиёт ва молия вазирлиги томонидан таклиф этилади.
Транспорт, энергетика ва телекоммуникация каби соҳалардаги давлат иштирокидаги активларни ўз ичига олган, умумий қиймати 2,44 миллиард АҚШ долларига тенг портфелга эга жамғарма хорижий инвестицияларни жалб қилиш ва мамлакат капитал бозорини ривожлантиришни мақсад қилган.
UzNIF IPO бўйича якуний нарх “боок-буилдинг” жараёни якунига кўра белгиланишини, бу жараён эса май ўрталарида эълон қилинишини кутмоқда. Лондон ва Тошкент фонд биржаларида савдоларга қўйиш (листинг) эса шундан сўнг тез орада амалга оширилади.
“Биз UzNIF’нинг Лондон фонд биржаси ва Тошкент фонд биржасида IPO ўтказиш ниятини расман тасдиқлаётганимиздан мамнунмиз”, — деди Templeton Global Investments компаниясининг Марказий Осиё бўйича бош ижрочи директори Мариус Дан.
“UzNIF IPO’си Ўзбекистон капитал бозорлари учун ҳам, мамлакатнинг энг тез ривожланаётган иқтисодиётларидан бирига инвестиция киритиш имконини берувчи платформа сифатида UzNIF учун ҳам муҳим босқичдир. Бу IPO Ўзбекистондан чиққан илк халқаро акциялар таклифи бўлади. Бу эса мамлакатда амалга оширилаётган ислоҳотлар, барқарор иқтисодий ўсиш, тезкор трансформация ва халқаро инвесторлар учун жозибадорлик ортиб бораётганининг яққол исботидир”.
