Биринчи ярим йилликда Ўзбекистон банкларининг жами кредит портфели 575 трлн сўмга етди

2025 йил 1 июль ҳолатига кўра, Ўзбекистон банкларининг жами кредит портфели 575,2 триллион сўмни ташкил қилмоқда. Бу ҳақда Марказий банк томонидан эълон қилинган ҳисоботда келтириб ўтилган. 

Йил бошидан буён мамлакат банкларининг умумий кредит ҳажми 42,1 триллион сўмга ошган.

Давлат банклари

Давлат банклари кредит портфели ҳажми бўйича етакчиликни сақлаб қолмоқда. Ушбу сегментдаги банклар томонидан берилган кредитлар умумий қиймати 394,2 триллион сўмни ташкил этди. Бу кўрсаткич январь ойига нисбатан 27,5 триллион сўмга кўпайган.

Давлат банклари орасида энг йирик кредит портфели Ўзбекистон Миллий банкига (НБУ) тегишли бўлиб, унинг ҳажми 109,3 триллион сўмга етган. Бу йил бошига нисбатан 1,3 триллион сўмлик ўсишни англатади.

Кредит портфели бўйича иккинчи ўринни эса Агробанк эгаллади. Банкнинг ажратган фаол кредитлари 14,5 триллион сўмга ошиб, жами 73,9 триллион сўмга етди. Шу тариқа банк аввал иккинчи ўринда бўлган Ўзсаноатқурилишбанк (СҚБ)ни ортда қолдирди. 

Шунингдек, Алоқабанк(+2,8 триллион сўм) ва Халқ банкида (+2,3 триллион сўм) ҳам сезиларли ўсиш кузатилган. Умуман олганда, давлатга тегишли бўлган барча 9 та банкда кредит портфели ўсиши кузатилган.

Бошқа банклар

Давлат улушига эга бўлмаган банклар сегментида ҳам ижобий динамика кузатилди. Уларнинг умумий кредит портфели 14,6 триллион сўмга ошиб, 181 триллион сўмни ташкил қилди. 

Бу тоифадаги банклар ичида Ипотека банк 35,1 триллион сўм билан етакчилик қилмоқда. Бироқ ушбу банкда йил бошига нисбатан 28 миллиард сўмлик пасайиш қайд этилган.

Хусусий банклар орасида энг катта ўсиш Капиталбанк ҳиссасига тўғри келди. Унинг кредит портфели 3,5 триллион сўмга ошиб, 35,3 триллион сўмга етган. 

Шунингдек, TBC Bank (+3 триллион сўм), Ҳамкорбанк (+1,7 триллион сўм), Ҳаётбанк (+1,6 триллион сўм) ва Анорбанк (+1,5 триллион сўм) кредит портфеллари ҳам сезиларли даражада кенгайгани билан ажралиб турди.