Apple’дан Claude AI’гача: хорижий Big Tech компаниялари I чоракда Ўзбекистонда қанча солиқ тўлади?

Солиқ қўмитаси маълумотларига кўра, 2026 йилнинг январь–март ойларида Ўзбекистонда электрон хизматлар кўрсатувчи хорижий компаниялар томонидан кўрсатилган хизматлар қиймати 552 млрд сўмга етди. Бу ўтган йилнинг мос давридаги 306,6 млрд сўмга нисбатан қарийб 81 фоизга кўп.

Шу даврда ушбу компаниялар томонидан тўланган солиқлар ҳажми ҳам сезиларли ошган. 2025 йил январь–март ойларида хорижий электрон хизмат кўрсатувчи компаниялар 36,2 млрд сўм солиқ тўлаган бўлса, 2026 йилнинг биринчи чорагида бу кўрсаткич 65,7 млрд сўмни ташкил этган.

Ўзбекистонда электрон шаклда хизмат кўрсатувчи хорижий компаниялар сони ҳам ортиб бормоқда. 2025 йил 1 январь ҳолатига бундай компаниялар сони 63 та бўлган бўлса, 2026 йил 1 январда 78 тага, 1 апрель ҳолатига эса 89 тага етган.

2026 йилнинг биринчи чорагида энг кўп солиқ тўлаган хорижий компаниялар рейтингида Apple биринчи ўринни эгаллади. Компания томонидан кўрсатилган хизматлар қиймати 134,8 млрд сўмни, тўланган солиқ миқдори эса 16,1 млрд сўмни ташкил қилган.

Кейинги ўринлардан Google ва Meta жой олди. Google 123,6 млрд сўмлик хизмат кўрсатиб, 14,9 млрд сўм солиқ тўлаган. Метаъда эса хизматлар қиймати 117 млрд сўм, тўланган солиқ миқдори 13,9 млрд сўм бўлган.

Рейтингнинг кучли бешлигига, шунингдек, Valve Corp. ва OpenAI (ChatGPT) ҳам кирди. Valve Corp. (Steam) 69 млрд сўмлик хизматлар учун 8 млрд сўмдан ортиқ солиқ тўлаган. OpenAI эса 21,4 млрд сўмлик хизматлар кўрсатиб, 2,5 млрд сўм солиқ тўлаган.

Топ-10 рўйхатини Anthropic (Claude AI), Midasbuy, TikTok, Booking.com ва Netflix якунлаган. Хусусан, Anthropic 12,5 млрд сўмлик хизматлар учун 1,4 млрд сўм, Midasbuy 11 млрд сўмлик хизматлар учун 1,3 млрд сўм, TikTok 7,2 млрд сўмлик хизматлар учун 868,3 млн сўм солиқ тўлаган. Booking.com’да бу кўрсаткич мос равишда 5,8 млрд сўм ва 694,7 млн сўмни, Нетфлихъда эса 5,1 млрд сўм ва 570,4 млн сўмни ташкил этган.