Apple iOS 19’ни ўтказиб юбориб, тўғридан-тўғри iOS 26’га ўтмоқда
Apple операцион тизимларидаги рақамли номлашдан воз кечиб, янги версияларни йил асосида аташни бошлайди. Янги тизим 9 июнь куни WWDC 2025’да эълон қилинади.
Bloomberg хабарига кўра, Apple ўзининг барча операцион тизимларида номлаш тизимини тубдан ўзгартиришни режалаштирмоқда. Эндиликда iOS, macOS, iPadOS, watchOS, tvOS ва visionOS версияларига рақамлар ўрнига йиллар билан ном берилади. Масалан, бу йилги iOS 19 ўрнига “iOS 26” номи ишлатилади.
Apple бу ўзгаришни бренддаги ягона услубни яратиш ва ҳозирги, кўпчилик фойдаланувчи ва ишлаб чиқувчилар учун chalkash бўлган номлаш тизимидан воз кечиш мақсадида амалга оширмоқда. Масалан, iOS 18, watchOS 12, macOS 15 ва visionOS 2 каби тизимлар турли рақамларга эга, чунки уларнинг илк версиялари турли вақтларда чиқарилган.
Apple бу ёндашувни 9-июн куни бўлиб ўтадиган анъанавий Worldwide Developers Conference (WWDC) тадбирида расман эълон қилади. Номлашдаги ўзгаришлар билан бирга янги фойдаланувчи интерфейси ҳам тақдим этилади. Янги ўзгаришлар ҳақида батафсил бу ерда ўқиш мумкин.
Бу қарор Samsung ва Microsoft компанияларининг илгари қўллаган стратегиясига ўхшайди. Масалан, Samsung 2020 йилдан бошлаб телефонларини йил номи билан (Galaxy S20, S21 ва ҳ.к.) атай бошлаган. Microsoft эса буни 1995 йилда Windows 95 билан бошлаган эди.
Apple'даги номлашнинг фарқи шундаки, у янги тизимларига ҳозирги йил эмас, балки яқинлашиб келаётган йил номини беради. Масалан, 2025 йил сентябрида чиқадиган янги тизимлар 2026 йил номи билан аталади. Бу эса кўпроқ автомобиль компанияларининг янги моделлари номланиш усулига ўхшайди. Агар Apple бу стратегияни давом эттирса, кейинги янгиланишлар “27” рақами билан чиқади.
Apple бундан олдин ҳам ўзининг iWork ва iLife дастур тўпламларида шунга ўхшаш номлашни синаб кўрган эди. 2007 йил август ойида у iWork ’08 ва iLife ’08ни чиқарган, кейинчалик бу iLife ’11 билан давом этган (2010 йил октябрда чиққан).
Янги ўзгаришлар доирасида, Apple iPad’га Mac’га ўхшаш функциялар қўшиб, уни иш муҳитида кўпроқ фойдали қилмоқчи. Компания, шунингдек, Apple Intelligence платформасида ишлатиладиган сунъий интеллект (AI) моделларини учинчи томон ишлаб чиқувчиларига очмоқда.
Йил давомида кутилayotgan бошқа янгиликлар орасида AirPods ва Siri учун жонли таржима режими, Vision Pro учун кўз билан скрол қилиш имконияти мавжуд. AI йўналишида соғлиқни сақлаш функциялари ва ақлли батарея бошқарув режими ҳам тақдим этилади.
