2025 йилда UzAuto Motors’нинг тушуми ва операцион фойдаси камайди

UzAuto Motors АЖ 2025 йилни тушум ва операцион фойда пасайиши билан якунлади. Бироқ молиявий даромадлар ошгани ҳамда валюта курси фарқидан фойда қайд этилгани ҳисобига компаниянинг соф фойдаси ўсди.

Компаниянинг 2025 йил якунлари бўйича консолидациялашган молиявий ҳисоботига кўра, йиллик тушум $4,08 млрдни ташкил этди. Бу 2024 йилдаги $4,24 млрдга нисбатан 3,7 фоизга кам.

Тушум қисқариши фонида асосий операцион кўрсаткичлар ҳам пасайган. Хусусан, ялпи фойда 2024 йилдаги $582,2 млндан 2025 йилда $459,7 млнгача камайган. Операцион фойда эса $383,3 млндан $292,5 млнгача тушган.

Бу кўрсаткичларга сотув таннархининг юқори даражада сақланиб қолгани ва операцион харажатларнинг ошгани таъсир қилган. 2025 йилда сотув таннархи $3,62 млрдни ташкил этди. Бу 2024 йилдаги $3,66 млрдга нисбатан бироз кам бўлса-да, тушумга нисбатан улуши ошган.

Жумладан, 2024 йилда сотув таннархи тушумнинг қарийб 86 фоизига тенг бўлган бўлса, 2025 йилда бу кўрсаткич 89 фоизга яқинлашган. Натижада ялпи фойда сезиларли қисқарган.

Шунга қарамай, UzAuto Motors йилни соф фойданинг ўсиши билан якунлаган. Компаниянинг 2025 йилдаги соф фойдаси $339,6 млнни ташкил этди. 2024 йилда бу кўрсаткич $314,9 млн бўлган.

Соф фойданинг ошишида нооператсион омиллар муҳим роль ўйнаган. Хусусан, компаниянинг молиявий даромадлари $65,6 млндан $94,6 млнгача ошган. Бундан ташқари, 2025 йилда валюта курси фарқидан $62,6 млн фойда қайд этилган. Таққослаш учун, 2024 йилда компания бу йўналишда $25,6 млн зарар кўрган.

Харажатлар қандай ўзгарди?

Компаниянинг маъмурий харажатлари 2025 йилда ошган. Ҳисоботга кўра, ушбу харажатлар 2024 йилдаги $61,1 млндан $73,9 млнгача кўтарилган. Сотиш харажатлари эса бироз камайиб, $128,3 млндан $122,5 млнгача тушган.

Солиқ харажатларида пасайиш кузатилган. 2025 йилда UzAuto Моторсънинг даромад солиғи харажати $56,9 млнни ташкил этган. 2024 йилда бу кўрсаткич $62,6 млн бўлган.

Нақд пул оқими ҳисоботига кўра, компания йил давомида $53,9 млн даромад солиғи тўлаган. Бу 2024 йилдаги $63,5 млн кўрсаткичдан паст.

Шу билан бирга, йил охирига келиб компаниянинг солиқ мажбуриятлари ошган. Даромад солиғи бўйича тўланиши керак бўлган сумма $3,1 млндан $18,9 млнгача кўтарилган. Бошқа солиқлар бўйича қарздорлик эса $4,2 млндан $15 млнга яқинлашган.

Активлар ва капитал ошди, мажбуриятлар камайди

2025 йил охирида UzAuto Motors АЖнинг жами активлари $2,64 млрдни ташкил этди. Бир йил аввал бу кўрсаткич $2,46 млрд бўлган.

Капиталдаги ўсиш янада сезиларли бўлган. Компаниянинг жами капитали 2024 йил якунидаги $908,8 млндан 2025 йил охирида $1,29 млрдгача ошган. Бу асосан тақсимланмаган фойданинг кўпайиши ҳисобига шаклланган.

Мажбуриятлар эса камайган. 2024 йил охирида компаниянинг жами мажбуриятлари $1,56 млрд бўлган бўлса, 2025 йил якунида $1,35 млрдгача тушган.