Олтин нархи тарихда биринчи маротаба $3 200 дан ошди

Олтин нархи тарихий рекорд ўрнатди. 11 апрель куни олтин нархи жаҳон бозорида троя унция учун илк маротаба $3 200 дан ошди. Хабар нашр қилинаётган пайтда қимматбаҳо металл биржаларда $3 225 атрофида савдо қилинмоқда. 

Олтин нархининг бундай кўтарилишини Доналд Трампнинг мамлакатларга эълон қилган юқори бож тарифларини 90 кунга тўхтатиб туриш ҳақидаги қарори билан боғлаш мумкин. Айнан мазкур эълондан сўнг олтин нархи яна ошишни бошлаган эди ва ҳозирга келиб рекорд миқдорга етди. 

Олтин нархи бўйича юқори прогнозни Macquarie Group тақдим этган бўлиб, унинг тахминига кўра, 2025 йилнинг учинчи чорагида олтин нархи $3,500 га етиши мумкин.

Ундан ташқари, Goldman Sachs’нинг энг охирги прогнозига кўра, олтин нархи $3 300 га чиқиши ҳам мумкин. 

Ўзбекистонда олтин нархи

11 апрель куни Марказий банк томонидан муомалага чиқарилган олтин қуймалари нархи ҳам рекорд даражага етди. 5 граммлик олтин қуйма нархи илк маротаба 6,8 млн сўмдан ошди. Олтин қуймаси бир грами ҳозирда 1 млн 376 минг 560 сўмга баҳоланмоқда. 

Тўлиқ нархлар:

• 5 грамм — 6 млн 883 минг сўм
• 10 грамм — 13 млн 766 минг сом
• 20 грамм — 27 млн 531 минг сўм
• 50 грамм — 68 млн 828 минг сўм
• 100 грамм — 137 млн 656 минг сўм

Ўзбекистонда Марказий банк томонидан 999,9 софликдаги олтиндан  5, 10, 20, 50 ва 100 граммли қуймалар сотувга чиқарилган ва қуймалар нархини регулятор ҳар куни янгилаб боради. 

Олтин қуймаларини банклардан сотиб олиш имконияти мавжуд. Банкларнинг манзиллари ва батафсил маълумотларни Марказий банк расмий сайтидан топиш мумкин.